الخميس، 6 ديسمبر، 2012

علاش الدستور ؟

ياللي تحسابوا إن الحكاية زي قبل نبي نفكركم راهي تغيرت
مصطفى عبدالجليل ورئيس الوزراء السابق الكيب الصورة من  موقع قورينا

عبد الجليل مشي .. والكيب لحقه .. وشوية حيلحقه المقريف .. ومن بعدهم زيدان ، واللي جاي ماشي
ومش باقي غير وجه الله والدستور الجاي .
إذا كنت متفكرش في نفسك، ففكر إنك تضمن حق أولادك، متقولش "إكتبولنا الدستور" وكون إنت جزء منه
بعد كل هالدم، مزال ترضى يجي حد وصي عليك؟
لو قلتلي الدستور منفهموش فيه وقصة 42 سنة بلا دستور ... حنرجع نقولك مش محتاجة هلبة
شن هي حقوقك ؟ شن هي الحاجات اللي مفروض الدولة إديرهالك، بالمختصر في الدستور مكانها كرؤوس عناوين باش بعدين لما يبوا يطلعوا قانون حيكون الدستور مرجعية .
تبي توقف وتعبر على رايك ومفيش حد يكلمك؟ ومفيش حد يطلق عليك حارق خارق ولا اربعطاش ونص !
ولنفترض إنك تبي تعيش في دولة فيدرالية ؟ هذا حقك ومفيش حد حيجبرك عبّر بالإستفتاء

صورة من موقع ؤسان
ونجوا لقصة دسترة اللغة الأمازيغية ..
وحنعبر هني عن نفسي .. بصراحة انا أشجّع وبشدة أن ترعى الدولة ثقافتنا الأمازيغية وأن تساهم في تنميتها .. أنا أدعم تضمين حق الأمازيغ في التعبير والتعامل بلغتهم واليوم لا أحد سيكمم فمّ آخر إلا جبان بقوة السلاح !
تضمين الأمازيغية في الدستور راه مش غولة .. أفهم قبل كيف وبعدين أنت ورايك ، متخوّنش حد بالله !

أكيد أنت شفت بعد ثورة فبراير حالات انتهاك لحقوق الإنسان
إيه .. واللي ثار على الظلم مستحيل ينكر الشيء هذا واللي بيقول فبراير مفيهاش أخطاء نبي نقوله ريّح دماغك !
دسكة ثورة سبتمبر النزيهة الشريفة هذه معاش نبوها .. فبراير مليانة أخطاء لأن الشعب اللي ثار شعب ليبي نفسه مش جاي من المريخ
بس الفرق إنه طرفين لكل واحد وجهة نظر مستميت عليها
ولما نبوا نصلحوا غلطنا نبوا نمشوا نديروا دستور يضمن حق الناس
نبوا نصلحوا غلطة عمرنا اللي درناها بيدينا يوم ضحكنا وهتفنا للقدافي وهو يلغي كل القوانين المعمول بيها (يوم نحس النقاط الخمس)

تبي البلاد يكون فيها احزاب وتمشي تصوت للي نفسك راضية عليك
ولا تبي واحد وخلاص هكي انت معشش في واحد :/
قصدي .. توا الكلام للي مزال مؤمن بفكرة ان هذاك الراجل مزال حي
متضيعش مستقبل صغارك أحسن !
لجنة الستين لكتابة الدستور في1951

توا بنتكلم من وجهة نظري ولثاني مرة، نشوف في هلبة ناس تبي ترجع لدستور ال51 .. به كويس هذا رأيكم
دستور ال51 كان رائع وقتها.. وحد ليبيا وضمن حقوق الإنسان والأقليات لكن علاش بنرجعوله بعد 60 سنة ؟
هل هذا تبرير لفشلنا قبل ما نحاولوا نديروا دستور جديد ؟
دستور 51 زي ما فيه نقاط كويس فيه نقاط مش لينا والمطالبين بالتعديل اكيد مش كل شي حيتعدل
رأيي أن نبدأ دستور ليبيا الحديثة مطلع العام 2013، بكفاءات ليبية قادرة على ضمان حق هذا الوطن وتضميد جرحه .
الدستور قرار مصيري
يا ليبيين .. هو قرار منكم يا يمشي ليبيا قدام
يا يدير فيها مدار السيد مرسي في مصر !
وانتم قررّوا



إرسال تعليق